EPISTOLA 171

Scripta paulo post superiorem.

Alypius et Augustinus Peregrino excusantes formam superioris epistolae ad Maximum datae.

DOMINO BEATISSIMO, ET VENERABILITER CARISSIMO FRATRI ET COEPISCOPO PEREGRINO, ALYPIUS ET AUGUSTINUS, IN DOMINO SALUTEM.

1. Ad honorabilem fratrem nostrum Maximum litteras dedimus, credentes eum gratanter eas suscepturum: utrum tamen aliquid profecerimus, proxima occasione, quam reperire potueris, dignare rescribere. Sciat sane prolixas epistolas ad familiarissimos nostros, non solum laicos, verum etiam episcopos sic, quo modo haec scripta est, ad eos scribere nos solere, ut et cito scribantur, et charta teneatur commodius cum leguntur, ne forte istum morem nostrum nesciens, factam sibi arbitretur iniuriam.